رووداو دیجیتاڵ
وەزیری دەرەوەی ئەمریکا دەڵێت، رەنگە هەر ئەمڕۆ دووشەممە (25ـی ئایار) رێککەوتنی کۆتاییهێنان بە شەڕ لەگەڵ ئێران رابگەیێندرێت، بەڵام دۆناڵد ترەمپ، سەرۆکی ئەمریکا داوا دەکات پەلە نەکرێت.
لە 8ـی نیسانەوە ئاگربەست لەنێوان ئەمریکا و ئێران راگەیێندراوە بۆ ئەوەی دەرفەت بە دانوستاندن بدرێت، بەڵام هێشتا ئەمریکا گەمارۆی لەسەر بەندەرەکانی ئێران لانەبردووە و تارانیش هاتووچۆی کەشتییەکانی لە کەنداو پەک خستووە.
مارکۆ روبیۆ، کە ئێستا لە هیندستانە، بە رۆژنامەڤانانی گوت: "پێمانوابوو دوێنێ شەو یان ئەمڕۆ هەواڵی نوێمان دەبێت. پێشنیازێکی زۆر باشمان لەبەردەستدایە سەبارەت بە کردنەوەی تەنگەی هورمز."
ترەمپ: کات لە قازانجی ئێمەیە
لە بەرامبەردا، ترەمپ لە تۆڕی کۆمەڵایەتیی خۆی، ترووس سۆشیاڵ، رایگەیاند کە داوای لە دانوستاندنکارانی ئەمریکا کردووە پەلە نەکەن، چونکە "کات لە قازانجی ئێمەیە". ئەو هۆشداریشی دا کە تاوەکو رێککەوتنەکە بەتەواوی واژۆ نەکرێت و پەسەند نەکرێت، گەمارۆی سەر ئێران وەک خۆی دەمێنێتەوە.
لەلایەکی دیکەوە، ئاژانسی تەسنیمی ئێرانی دەڵێت هێشتا چەند خاڵێکی گرنگ چارەسەر نەکراون، بەتایبەتی پرسی ئازادکردنی پارە سڕکراوەکانی ئێران.
بەڵام تەنیا بڵاوبوونەوەی هەواڵی نزیکبوونەوەی رێککەوتنەکە، وایکرد نرخی نەوت لە بازاڕەکانی جیهاندا بەڕێژەی نزیکەی 5٪ دابەزێت.
دواخستنی پرسی ئەتۆمی بۆ دوای رێککەوتن
بەرپرسانی ئێران دەڵێن، هەرچەندە رەشنووسی رێککەوتنەکە ئامادەیە، بەڵام گفتوگۆکردن لەسەر بەرنامە ئەتۆمییەکەیان بۆ ماوەی 60 رۆژ دوای واژۆکردنی رێککەوتنەکە دواخراوە.
مەسعود پزیشکیان، سەرۆککۆماری ئێران گوتی: "ئێمە هێشتا ئامادەین جیهان دڵنیا بکەینەوە کە بەدوای چەکی ئەتۆمیدا نین."
لەلای خۆیەوە، بنیامین نەتەنیاهوو، سەرۆکوەزیرانی ئیسرائیل رایگەیاندووە کە لەگەڵ ترەمپ هاوڕان لەسەر ئەوەی "دەبێت هەڕەشەی ئەتۆمیی ئێران بەتەواوی لەنێوببرێت."
پاڵپشتیی وڵاتانی ناوچەکە
رۆژی شەممە، سەرکردەکانی قەتەر، سعودیە، ئیمارات، میسر، ئوردن و بەحرێن، لەگەڵ نوێنەرانی تورکیا و پاکستان بە تەلەفۆن لەگەڵ ترەمپ قسەیان کردووە بۆ تاوتوێکردنی رێککەوتنەکە. شەهباز شەریف، سەرۆکوەزیرانی پاکستان کە وڵاتەکەی نێوەندگیری سەرەکییە، گوتی، هیوادارە بەم زووانە گەڕێکی دیکەی دانوستاندن رێکبخات.
کێشەکانی لوبنان و حیزبوڵڵا بەردەوامن
لە لایەکی دیکەوە، سوپای ئیسرائیل بەردەوامە لە بۆردوومانکردنی باشوور و رۆژهەڵاتی لوبنان، سەرەڕای ئەوەی لە 17ـی نیسانەوە ئاگربەست لەوێش راگەیێندراوە.
وەزیری دەرەوەی ئەمریکا بەتووندی رەخنەی لە حیزبوڵڵا گرت و گوتی کە دەیانەوێت لوبنان بگەڕێننەوە نێو "ئاژاوە"، ئەوەش دوای ئەوەی نەعیم قاسم، سەرۆکی حیزبوڵڵا داوای لە خەڵک کردبوو بڕژێنە سەر شەقامەکان بۆ رووخاندنی حکومەتی هەڵبژێردراوی لوبنان.