رووداو دیجیتاڵ
گۆڤاری Gladysـی ئەمریکی، دیزاینەری ناسراوی کورد لارا دزەیی، وەک یەکێک لە "25 ئیلهامبەخشترین کەسایەتیی ساڵی 2025" دەستنیشان کرد.
لارا دزەیی، کە شانبەشانی ئەستێرە جیهانییەکانی وەک نیکۆڵ کیدمان و تۆم فۆرد لە لیستەکەدا ناوی هاتووە، بەهۆی کارە هونەرییەکانی لە تێکەڵکردنی جلوبەرگی کوردی لەگەڵ فاشنی هاوچەرخ و گەیاندنی کولتووری کوردی بە جیهان، ئەم ناسناوەی پێبەخشراوە.
گۆڤاری Gladys کە گۆڤارێکی وەرزیی ئەمریکییە، ساڵانە لیستێک بڵاودەکاتەوە بۆ رێزلێنان لەو خاوەنکار، هونەرمەند، ئەکتەر و کەسایەتییانەی کە بوونەتە سەرچاوەی ئیلهام. ئەم ساڵ، لارا دزەیی وەک نوێنەری کولتوور و هونەری کوردی، پانتاییەکی بەرفراوانی گۆڤارەکەی بۆ تەرخان کراوە.
"نامەی خۆشەویستی بۆ کولتوورەکەم"
گۆڤارەکە بە وردی باسی کارەکانی لارا دزەیی دەکات و ئاماژە بە نوێترین کۆکراوەی [کۆلێکشن] دەکات بە ناوی "میلانی سیحراوی" (Milan Enchanted) کە لە هەفتەی فاشنی میلانۆ نمایش کرا.
گۆڤارەکە گوتەیەکی لارا دزەیی گواستووەتەوە کە دەڵێت: "ئەم کۆلێکشنە نامەیەکی خۆشەویستییە بۆ کولتوورەکەم، بۆ گەلەکەم و بۆ هەموو ئەو ژنانەی کە جورئەتیان کردووە خەون بە دەرەوەی سنوورەکانەوە ببینن. لەڕێگەی میلانی سیحراوییەوە، ویستم نەریت و خەیاڵ پێکەوە ببەستمەوە، کە هەر تەقەڵێکی چیرۆکی خۆڕاگری، شانازی و جوانی دەگێڕێتەوە."
بەگوێرەی گۆڤارەکە، کۆلێکشنەکەی لارا لە میلان بە پشتیوانیی چەندین لایەن لەوانە Al-Assad، KSAC، Nafith، هێڵی ئاسمانیی کوردستان و کونسوڵخانەی ئیتاڵیا لە هەولێر پێشکەش کراوە، کە ئەمەش نیشانەی بایەخی نێودەوڵەتیی کارەکانیەتی.
لە کەرتی نەوت و گازەوە بۆ جیهانی جلوبەرگ
لارا دزەیی، کچی هونەرمەندی گەورەی کورد، هۆمەر دزەییە. لە ڤیەننای پایتەختی نەمسا لەدایکبووە و لە ئەمریکا گەورە بووە. بڕوانامەی لە پەیوەندییە نێودەوڵەتییەکاندا لە زانکۆی جۆرج مەیسن بەدەستهێناوە و زمانەکانی کوردی، ئینگلیزی، فارسی، عەرەبی و ئەڵمانی دەزانێت.
ژیانی پیشەیی لارا چیرۆکێکی سەرنجڕاکێشی هەیە. بۆ ماوەی 15 ساڵ لە کەرتی نەوت و گازدا کاری کردووە، بەڵام دواتر بڕیاریداوە بەدوای خولیا راستەقینەکەیدا بگەڕێت و ژیانی خۆی بۆ دیزاینکردنی جلوبەرگی کوردی بە شێوازێکی کلاسیک و مۆدێرن تەرخان بکات. ئەم گۆڕانکارییە گەورەیە لە ژیانیدا، یەکێکە لەو هۆکارانەی کە وایکردووە وەک کەسایەتییەکی ئیلهامبەخش بناسرێت.