رووداو-هەولێر
ئەمڕۆ گەڕی حەوتەمی یارییەکانی خولی یانە پلە یەکەکانی کوردستان لە شار و شارۆچەکەکانی باشووری کوردستان بەڕێوەدەچێت و شەش یاری دەکرێن.
یانەی چەمچەماڵ کە پلەی یەکەمی ریزبەندیی خولەکەی گرتووە، لە یاریگەی خۆیدا بەرامبەر بە یانەی رزگاری یاری دەکات، چەمچەماڵ ١٢ خاڵی هەیە و رزگاریش دوو خاڵ لەو دوورە و لە پلەی سێیەمە و خاوەنی ١٠ خاڵە.
هەرچی یانەی کۆیەی دووەمە، لە یاریگەی خۆی یاری لەگەڵ یانەی ئاکرێ دەکات، کۆیە ١٠ خاڵی هەیە و ئاکرێش هەشت خاڵی هەیە.
لە یانەی ئاسۆی شاری هەولێر لە دەرەوەی یاریگەی خۆی و لە شاری کەرکووک میوانی یانەی خاکە، ئاسۆ پلەی چوارەمی بەدەستەوەیە و هەشت خاڵی هەیە و یەک خاڵ لە پێش یانەی خاکەوەیە.
یانەی خانەقینیش لە یارییەکی بەهێزدا میوانداری یانەی هەڵەبجەی شەهید دەکات، جیاوازی نێوان ئەم دوو تیپەش تەنیا خاڵێکە، خانەقین شەشەمە و هەشت خاڵی هەیە، هەڵبجەی شەهیدیش بە حەوت خاڵەوە نۆیەمە.
دوو یاری دیکەش هەن کە یانەکانی ئاڵتون کۆپری و ئاشتی بەیەکدەگەن، شەقڵاوەش لە بلێ میوانی یانەی هەڵۆیە.
سەرجەم یارییەکان لە کاژێر ١٤:٣٠ دەستپێدەکەن و یانەی سەیدسادقیش چاوەڕوانە.
