ئاسایشی سلێمانی: هەشت تیرۆریست لە تەکیەی چەمچەماڵ دەستگیرکران

ئاسایشی رۆژئاوای سلێمانی لە راگەیێندراوێکدا کە ئەمڕۆ سێشەممە 7-2-2023، بڵاویکردووەتەوە دەڵێت، ئەو کەسانە "تاقمێکی تیرۆریستین، لە یاسا هەڵاتبوون و لە سنووری قەزای چەمچەماڵ خۆیان حەشاردابوو، دەستگیرکراون." 

ئەو کەسانە بە پێی مادەی 2ی تیرۆر دەستگیرکراون. ئاسایشی رۆژئاوای سلێمانی ئاماژە بەوەش دەدات؛ دوای رەزامەندی دەزگای ئاسایشی هەرێمی کوردستان لێکۆڵینەوە لەبارەی ئەم کەیسەوە دەستیپێکرد و "بەڵگەی دروست لەسەر پێشینەی تاقمەکە دەستکەوت و بەبڕیاری دادوەری لێکۆڵینەوە رۆژی 5ی 2ی 2023 لە چەند هەڵمەتێکی جیاجیادا هێزەکانی بەڕێوەبەرایەتیمان بە هاوکاری هێزەکانی ئۆپەراسیۆنی دەزگای ئاسایشی هەرێم، بەڕێوەبەرایەتیی ئاسایشی سلێمانی، 8 تۆمەتباری لە یاسا هەڵاتوو کە داواکراوبوون لە دادگاکانی عێراق دەستگیرکران."

وەک لە راگەیێندراوەکەی ئاسایشی رۆژئاوای سلێمانی دا هاتووە، پاش لێکۆڵینەوە دەرکەوتووە کە "تۆمەتبارە دەستگیراوەکان دانیان بەوە داناوە کە پێشینەی کاری تاوانکاری و تیرۆریان هەبووە و بەشداربوون لە چەندین کردەوەی تیرۆریستی و شەهیدکردنی هاووڵاتی و کارمەندانی هێزە ئەمنییەکانی عێراق بە ناوەکانی:

1- ص،ح،م

2- ص،م،م 

3- م،ص،م 

4- س،ص،م 

5- ع،ص،م

6- ص،ص،م

7- ر،ح،م 

8- ط،ص،م

سەرجەم دەستگیراوەکان بۆ لێکۆڵینەوەی زیاتر رووبەڕووی دادگە کراونەتەوە، لە بەشێکی دیکەی راگەیێندراوەکەدا ئاماژە بەوە کراوە کە ئەو تۆمەتبارانە "لە ساڵی 2004 پەیوەندیان بە رێکخراوی تیرۆریستی قاعیدەوە کردووە و بەشداربوون لە ئەنجامدانی چەندین کاری تاوانکاری و تیرۆریستی و دواتر بەیعەتیان بە تیرۆریستانی داعش داوە و دەبنە چەکدار و لە دەرەوەی یاسا و بەها مرۆڤایەتییەکان درێژە بە کارە تیرۆریستییەکانیان دەدەن دواتر بەمەبەستی خۆحەشاردان بەناوی خوازراو ناسنامەی ساختە و کارکردنەوە دێنە سنووری تەکیە و بازیان نیشتەجێ دەبن."