ئاسایشی دهۆک: هێرشەکەی ئەمڕۆ تیرۆریستی بوو

بەپێی روونکردنەوەی ئاسایش، ئەو کەسەی هێرشی کردووە و دواتر کوژراوە ناوی (ل. هـ.) بووە. 

رووداوەکە دوای نیوەڕۆی رۆژی دووشەممە 12-12-2022 روویدا، پەیامنێری رووداو لە دهۆک ئاماژەی بەوە کرد، هێرشکارەکە کورد نییە و خەڵکی بەرتلەیە. 

تاوەکو ئێستا هێزە ئەمنییەکان هۆکاری پشت هێرشەکەیان بڵاونەکردووەتەوە، بەڵام دەڵێن، دۆخەکە لەژێر کۆنترۆڵدایە و "بەرامبەر هەر هەوڵێکی تێکدەرانە دەوەستینەوە و رێگەنادەین ئارامیی دهۆک تێکبدرێت."

هێزەکانی ئاسایشی دهۆک لێکۆڵینەوە لە رووداوەکە دەکەن و بڕیارە ئەنجامەکەی بۆ رای گشتی بڵاوبکەنەوە.

ئەو کارمەندەی ئاسایشی دهۆک کە لە رووداوەکەدا شەهید بووە ناوی (ئازاد ئیبراهیم)ـە، تەمەنی 31 ساڵانە و خەڵکی گوندی بێسفکێ یە لە سنووری پارێزگای دهۆک. بریندارەکەش ناوی زیندان مزوورییە و نەشتەرگەری بۆ کراوە و "دۆخی تەندروستیی جێگیرە."

پرۆفایلی هێرشکارەکە:

- لەیس هاشم عەزیز
- ساڵی 1994 لەدایکبووە
- سەر بە هۆزی حەدیدییە لە سنووری نەینەوا
- خەڵکی گوندی عەلییە رەشە لە قەزای حەمدانییەی سەر بە نەینەوا