پارێزگاری نوێی زیقار دەستبەكاربوو

ئەمڕۆ چوارشەممە 8-4-2021 ئەحمەد خەفاجی، پارێزگاری نوێی زیقار لە كۆنگرەیەكی رۆژنامەڤانیدا گوتی: "هەڵمەتێكی فروانی ئاوەدانكردنەوە دەستپێدەکەین كە سەرجەم شارو شارۆچكەكانی پارێزگای زیقار دەگرێتەوە، سەرەتاش بە چارەسەری كێشەی كەمی ئاو لە چەند ناوچەیەكی شاری ناسریە دەستپێدەكەین".

خەفاجی ئاماژەی بەوەدا ژوورێكی ئۆپەراسیۆنیان  پێكهێناوە بۆ بەدواداچوونی قەیرانی كارەبا، ژوورەکە ئەمڕۆ پێنجشەممە دەستی بە کارەکانی کردووە، كە لە شارەزایانی وزە پێکدێت و  24 كاژێر كار دەكات بۆ چارەسەركردنی قەیرانی كارەبا.

پارێزگاری نوێی زیقار باسی لە دۆسیەی بێسەروشوێنان بە تایبەتی خۆپێشاندەران کرد و گوتی: "ئەو ئەنجامانە تاوتوێ دەكەین، كە لێژنەی پێشوو بەدواداچوونیان لەبارەوە كردووە و بەمزووانەش هەنگاوی گەورە لەبارەی دۆسیەکە دەنێین".

حازم ئەلسەعیدی، جێگری پارێزگاری زیقار بە تۆڕی میدیایی رووداوی راگەیاند: "دانانی دكتۆر ئەحمەد خەفاجی، بە پارێزگاری زیقار بە رەزامەندی هەموو لایەنەكان بووە لە پارێزگاكە".

رۆژی سێشەممەی 6-4-2021 مستەفا کازمی، سەرۆكوەزیرانی عێراق، سەردانی شاری ناسریەی کرد، دوای کۆبوونەوە لەگەڵ بەرپرسانی شارەکە، دكتۆر ئەحمەد خەفاجی، بە پارێزگاری نوێی زیقار دەستنیشانكرا.

دەستنیشانکردنی پارێزگاری نوێی زیقار پاش زیاتر لە مانگێک هات لە راسپاردنی عەبدولغەنی ئەسەدی، سەرۆکی دەزگای ئاسایشی نیشتمانی عێراق بۆ راپەڕاندنی ئەرکەکانی پۆستی پارێزگاری زیقار، دوای ئەوەی نازم وائیلی، پارێزگاری پێشووی زیقار لە ژێر گوشاری خۆپێشاندەرانی پارێزگاکە ناچار بە دەستلەکارکێشانەوە کرا.